نصائح هامة جدا عن كتابة السيرة الذاتية CV
١-سينجل او متزوج متحطهاش حتي لو متطلق/ة مساحة خصوصيتك مش من مسئولياتي الوظيفية
٢-الشركات ملهمش دعوة بمكان الولادة اهم حاجة عنوانك الحالي ولو الاتنين واحد تكتبها في خانة العنوان .. تشيل خالص مكان الولادة لاكنHR اهم حاجة بالنسبة ليه بعدك او قربك عن مكان العمل ودى عوامل بتزود فرصة قبولك ورفضك علي حسب الشركة تاني .. مولود في اسوان وعايش في القاهرة ..يهمني انك عايش فين
٣- بلاش في خانة الاهتمامات تكتب القراءة ,الرياضة ,السفر وانت اصلا مش بتعرف تخرج من بيتكو ... وبلاش تحط نقط ضعفك وقوتك بردو مليش دخل بيه الا لو اتسألت ! وبلاش بشتغل تحت ضغط ..اصلا وجودك في مصر دة لوحده ضغط ووظيفة لوحدها ! اكتب حاجات واقعية انت بتعيشها في ناس حرفيا بتسالك في اللي انت بتكتبه كلمة كلمة ولو باين انك بتحور Rejected !
٤- اما تيجي تحط وظيفة متحورش كتير وتكتب انك كنت مدير الشركة اللي كنت شغال فيها انت كدة بتزود فرصتك انه حرفيا يعجنك في الانترفيو لانه عاوز يعرف تفاصيل اكتر عن شغلك في مكانك القديم . بلاش اوفر وتقول انك اتصورت مع هتلر وتجيد التحدث مع الحيوانات ..احتمال يسألك حيوانات زي ايه تقوله مثلا انك بتتكلم معاه اهو ..Blacklisted
٥- لو مشتغلتش تكتب انك مشتغلتش وانك بتدور علي الفرصة دى في شركتهم عشان تتعلم وتاخد اكبر قدر من الخبرة عندهم وانك حابب انك تتعلم
٦- لو اشتغلت تكتب اسم الشركة والمسمي الوظيفي بتاعك ...وكنت بتعمل ايه ...يعني مهندس او محاسب او ...الخ تكتب تفاصيل كنت بتعمل ايه لو مكتبتش انا هعرف منين انك مكنتش تاجر معيز مثلا !
٧- لو بتقدم في وظيفة sales ومعاك عربية مثلا تكتب
"لدى سيارة واجيد القيادة واملك رخصة قيادة سارية"
٨- لو مخلص جيش تكتب مخلص او .مأجل او اعفاء .
٩- ترتيب كالاتي :
-المعلومات الشخصية ومعلومات التواصل
- التعليم
-الخبرات السابقة اذا وجدت
-الكورسات والدورات التعليمية
-الاهتمامات
١١- خلي الCV يكون PDF مش word ليه بقي ؟!
ال MS Office اللي بيفتح ملف ال word عموما بيفتح ببطء علي اجهزة اللي بيكون عليها نظام ويندوز وبالمقارنة مع Adobe Reader دة اسرع بكتير في فتح ال PDF ..فا لو انت بتعمل علي ميكروسوفت اوفيس هتعمل Save As وتختار فورمات( PDF) مش (.DOCX) عشان كمان حجمه يكون اقل فا مبيخدش وقت وانت بتبعته علي ميل الشركة .
١٢- ال CV صفحة او صفحتين مش اكتر